ڈاکٹر عامر عبداللہ محمدی

الحمدللہ ماشاء اللہ ڈاکٹر عامر عبداللہ محمدی 1972 میں کراچی کے ایک علمی و دینی گھرانے میں پیدا ہوئے۔

ابتدائی زندگی اور خاندانی پس منظر

والد ڈاکٹر خورشید احمد شیخ ایک طرف اسلامیات اور معاشیات میں ماسٹرز تھے، تو دوسری طرف براہ راست علامہ سید بدیع الدین شاہ راشدی پیر جھنڈا کے شاگرد تھے۔ انہوں نے ہندوستان کے علاقے سونی پت سے ایم ڈی ہومیوپیتھی اور ایم ایس سی کی تعلیم حاصل کی تھی۔

دینی تعلیم کا آغاز

بچپن میں دینی تعلیم وتربیت والدین سے ورثہ میں ملی۔ نورانی قاعدہ اور ناظرہ قرآن پڑھنے کا آغاز شیخ القرآن والحدیث مولانا محمود احمد حسن رحمہ اللہ کے پاس کیا اور بالاخر ان ہی سے صحیح البخاری بھی پڑھی۔

1987 میں جب علامہ احسان الہی ظہیر رحمہ اللہ کی شہادت ہوئی، تو انہوں نے دینی تعلیم حاصل کرنے کا فیصلہ کیا اور ہند وپاک کے عظیم وقدیم مدرسہ جامعہ دارالحدیث رحمانیہ میں داخلہ لیا۔

اساتذہ کرام سے اکتساب فیض

جامعہ رحمانیہ میں شیخ الحدیث مولانا عبدالرحمن چیمہ، شیخ الحدیث مولانا محمد افضال اثری، مولانا ابراہیم عبداللہ یوگوی اور مولانا عبدالمجید صاحبان سے علم حاصل کیا۔ پھر 1989 میں جامعہ ابی بکر اسلامیہ میں داخلہ لیا جہاں پروفیسر محمد ظفر اللہ مرحوم مدیر تھے۔

جامعہ ابی بکر میں جن اساتذہ کرام سے فیض حاصل کیا ان میں شیخ الحدیث مولانا حافظ مسعود عالم، مولانا عمر فاروق سعیدی، شیخ خلیل الرحمن لکھوی، شیخ ابو عبدالمجید محمد حسین بلتستانی، شیخ ابو خالد ابراہیم عبدالملک المدنی، شیخ موسی سوڈانی، شیخ ایمن مصری، شیخ جواد عبدالجواد، پروفیسر شیخ محمد یحییٰ عزیز اور شیخ فاروق قصوری شامل ہیں۔

اساتذہ کرام سے مزید اکتساب فیض

جن دیگر علماء کرام سے اکتساب فیض کیا ان میں مولانا عبدالقادر روپڑی، مولانا مفتی عبیداللہ عفیف، شیخ الحدیث علامہ عبداللہ ناصر رحمانی، شیخ الحدیث مولانا عبدالغفار روپڑی، مولانا عبدالرحمن سلفی، مولانا محمد سلفی عبدالسّتار دہلوی، پروفیسر محمد یامین محمدی، مولانا سید قاسم شاہ راشدی، مولانا محمد صادق خلیل، مولانا عبدالجلیل بھاولنگری، مولانا انور بدخشانی، مولانا قاری بشیر احمد، مولانا عبداللہ نور اور مولانا فاروق احمد عثمانی شامل ہیں۔